All posts in “вегетаријански / vegetarian”

Салата со боранија и пченка



рецепт земен и прилагоден од списанието Woman’s Day, август 1999

1/2 kg боранија, исчистена и исечена на половинки или третинки
2 пченки или 2 шољи замрзната пченка
сол, бибер
балсамик оцет
сенф
свеж магдонос, исецкан

боранијата ставете ја во вода што врие во која сте ставиле малку сол. варете ја 15тина минути или додека не омекне малку, ама не скроз да се свари.
јас ја направив салатата со свежа пченка, дека ја има сега на пазар, ама само се измачив да ја исчистам и да ги одвојам зрната, па потоа варењето траеше долго и на крајот мислам дека и вкусот на салатата би бил подобар ако се стави замрзната. на замрзнатата пченка и е потребно само неколку минути да се свари во зовриена вода со малку сол.
исцедете ги боранијата и пченката, помешајте ги во сад за салата, додадете им го магдоносот и преливот кој најлесно се прави ако во мала тегличка со капак ги ставите солта, биберот, оцетот и сенфот и силно ја протресете тегличката додека сè не се измеша убаво.

Tart tatin со патлиџани (Tomato tart tatin)





670 g патлиџани, исечени на пола
4 лажици маслиново масло
сол, бибер
свеж босилок

за тестото:
225 g обично брашно
25 g пченкарно брашно
100 g маргарин, ладен
25 g рендан пармезан
1 јајце

измешајте ги патлиџаните со маслиновото масло, солта и биберот и наредете ги во тавче со пречник од 25 cm на кое му се вади дното. јас ги пополнив празнините помеѓу половинките со парченца патлиџан. посипете ги патлиџаните со ливчињата босилок.

за тестото: помешајте ги двете брашна, па со прсти вмешајте го во нив маргаринот додека не добиете нешто како трошки. додадете го пармезанот, па направете дупка во срдината и ставете го јајцето и малку ладна вода колку да се добие меко тесто.

исукајте го тестото на малку побрашнета површина да се добие круг со пречник од 28 cm и ставете го врз патлиџаните, а краевите подбутнете ги околу патлиџаните во тавчето.

печете ја питава (не знам кој збор повеќе одговара, пита или погача, или некој друг, како превод за Tart Tatin) во загреана рерна на 180°C околу 50 минути. извадете ја од рерна и оставете ја десетина минути да се олади, а потоа превртете ја на тањир за послужување. се јаде и топла и ладна.

Bhindi bhajee (пржени бамји)


околу 300 gr бамји
4 средни патлиџани или една конзерва цели лупени патлиџани
1 кромид
1 лажиче цели зрна кумин
2 лукчиња, ситно исецкани
луто пиперче, ситно исецкано
пола лажиче куркума (турмерик)
пола лажиче гарам масала
сол, бибер

патлиџаните исечени на пола и измешани со малку маслиново масло, сол и бибер ставете ги во тавче со ребресто дно, со исечената страна надолу и печете ги околу 40 минути во рерна, негде на пола еднаш промешајте ги. потоа извадете им ја лушпата.
кромидот исечен на кришки испржете го малку да се зарумени, па додадете му го куминот и другите зачини, лукчето, пиперчето, бамјите и сол. пржете го тоа уште малку па ставете ги излупените патлиџани или конзервата патлиџани. оставете го на тивко околу 20 минути со повремено мешање. ако стане многу суво додајте малку вода.

Плескавици од тиквици



3 средни тиквици, изрендани
малку кромид, исецкан
1 лажица копар
2 лажици магдонос
3 јајца
1 лажица црвен пипер
сол, бибер
200 g сирење, издробено или исечено на коцки
1 шоља брашно
1 лажиче fivespice

изренданите тиквици ставете ги во цедалка, посипете ги со сол и оставете ги да се цедат 15 минути. Стиснете ги да се доисцедат и помешајте ги со останатите состојки.
Загрејте малку зејтин во тавче и ставајте од смесата со лажица. пржете ги плескавиците од двете страни додека не се заруменат и исцедете ги од зејтинот на кујнска хартија.

Парадајз чорба



1 кромид
неколку моркови
џус од патлиџани или неколку свежи патлиџани или (според мене најдобра варијанта) неколку цели замрзнати патлиџани ( за 1l вода треба 4 патлиџани)
вегета
сол
еден компир или малку фиде
свеж магдонос

испржете го кромидот на кратко, додадете ги морковите исечени на кругчиња и пржете ги со кромидот 1-2 минути, па ставете вода, вегета, сол и изрендајте ги замрзнатите патлиџани.
ако ставате компири (исечени на коцки), ставете ги во водата пред патлиџаните, а по неколку минути варење ставете ги и патлиџаните. оставете да се вари на тивко додека не се сварат компирите. на крај ставете доста свеж магдонос.

Макарони со печен зеленчук и свинско со печурки

за четворица:

2 пиперки
1 среден модар патлиџан
1 тиквица
2 патлиџана
маслиново масло
сол, бибер
неколку парченца исушени патлиџани
рукола
свеж босилок
2 лажици балсамик оцет
2-3 истолчени лукчиња
здробено сирење
500 gr интегрални макарони (или обични)

во големо тавче врз фолија намачкана со малку маслиново масло ставете го зеленчукот исечен на парчиња и помешан со сол, бибер и маслиново масло. се пече во рерна 25 минути со повремено мешање на 230°C.
макароните сварете ги според упатството, исцедете ги и помешајте ги со печениот зеленчук, сувите патлиџани, руколата, босилокот, оцетот, лукчето и сирењето и додадете сол и бибер ако треба.

800 gr свинско месо
вегета
cajun
рузмарин
сенф
истолчено лукче
маслиново масло
малку црно вино
250 gr свежи шампињони

измешајте го месото со зачините и оставете го да се маринира во фрижидер неколку саати. потоа ставете го во тавче, прекријте го со печурките исечени на ливчиња и испечете го во рерна.

Пржен ориз (Fried rice)


Се вари басмати ориз, во двојно повеќе вода и се лади веднаш во тенок слој на послужавник или големо тавче. Кога ќе се олади се става во фрижидер преку ноќ. Читав на неколку страници на интернет дека ако не се олади и остави преку ноќ сварениот ориз, зрната ќе се лепат и нема да биде убаво.
Во вок или голема тава се пржи еден кромид, ситно исецкан, 2 пиперки, ситено исецкани, морков на мали коцки и сланина на мали коцки, додека кромидот не се испржи добро.
Во мал сад се мешаат 1-2 лажици соја сос и 1 лажица сос од риба (fish sauce или oyster sauce).
Варениот ориз се додава на пржениот зеленчук и се меша веднаш. Се додаваат и замрзната пченка и грашок и сол. Бидејќи има доста ориз, не може само со соја сос да се добие вистинскиот вкус, па се става и сол и на крај се полева со соја сосот и се меша додека сите зрна не се обојат.

Maja

Кускус со зеленчук


1 шоља наут, оставен во вода преку ноќ, или една конзерва
1 кромид, ситно исецкан
1 стапче цимет
1 помал модар патлиџан, исечен на коцки
2 моркова, исечени на кругчиња
2 помали компира, исечени на коцки
1/4 лажиче пимент
3 лажички Хариса
1 помала тиквичка, исечена на коцки
1 зрел патлиџан, на парчиња
сол, бибер
свеж магдонос

ставете го кромидот да се пржи на тивко заедно со стапчето цимет, додека кромидот не омекне. потоа додадете ги модриот патлиџан, морковите и компирите и оставете ги да се пржат на тивко, поклопени, околу 10 минути, со повремено мешање. додајте ги пиментот, харисата, една чаша жешка вода, наутот, тиквицата, патлиџанот, сол и бибер. повторно поклопете го тенџерето и оставете ги да се готват уште 15тина минути. магдоносот додадете го на крајот, откако ќе го тргнете тенџерето од шпорет.
кускусот направете го според упатството на кутијата.

Пржени тиквици


измијте ја тиквицата и исечете ја на кругчиња. испржете ги кругчињата на средно загреан зејтин од двете страни (не мора да ги направите волку црни како мене). наредете ги во плиток тањир, ставете сол, ситно исецкано лукче, магдонос и балсамик оцет.

Ребра во црвено вино и цвекло печено во фолија


за ребрата во еден сад помешајте:

2 лажици зејтин
2 истолчени лукчиња
сол, бибер
200 ml црвено вино
2 лажици соја сос
2 лажички балсамик оцет
2 лажици кечап
2 лажички сенф
2 лажички мед

сето тоа прелијте го врз пола кило свински ребра и оставете го во фрижидер пола саат или повеќе. ако немате време за маринирање, можете да го прескокнете фрижидерот и веднаш да ги ставите да се печат на 180°C околу еден саат. еднаш или два пати во текот на печењето полејте ги ребрата со течноста. многу се вкусни со цвекло печено во фолија.

за цвеклото ви требаат две подолги парчиња фолија со кои ќе го обложите тавчето, а да има доволно и да се завитка цвеклото „херметички“. во тавчето врз фолијата ставете:

пола кило цвекло, излупено и исечено на крупни парчиња
многу лукчиња, цели, неизлупени, само малку смачкани
оригано
сол, бибер
маслиново масло
балсамик оцет

малку промешајте, затворете ја фолијата да не може да излегува пареа и ставете го тавчето во загреана рерна на 200°C. Треба да се пече 40-60 минути.

Ориз со тиквици

испржете еден кромид исечен на тенки кришки. додадете една пиперка исечена на кругчиња и една тиквица на четвртинки кругче и пржете ги на средно. потоа ставете малку сол, бибер, турмерик (куркума), коријандер во зрнца, мелен кардамом и 2-3 исцкани лукчиња и пржете уште малку.
се јаде со ориз, а за оризот другпат ќе праиме муабет.

Салата со модри патлиџани, наут, печени пиперки, сирење и маслинки


1 голем модар патлиџан
1 шоља наут, стоен преку ноќ во вода, варен пола саат и исцеден, или
1 конзерва наут, исцеден
2 црвени пиперки, печени, излупени и исчистени од семки (јас имав вакви замрзнати, ама
можете да употребите и пиперки од тегла)
бело сирење
црни маслинки
оригано
сол
бибер
балсамик оцет
маслиново масло
соја сос
2 лукчиња, истолчени

Модриот патлиџан исечете го по должина на тенки кришки, околу 5 мм дебели. намачкајте ги кришките со малку маслиново масло од двете страни, наредете ги во тавче во еден слој и печете ги во рерна 10тина минути, додека не омекнат во средината и не почнат да се заруменуваат. потоа наредете ги во тањир.

помешајте ги оцетот, соја сосот, лукчето, ориганото, солта и биберот и потоа, цело време мешајќи, полека сипете го маслиновото масло.

ставете ги наутот, исечените пиперки, сирењето исечено или здробено и маслинките во еден сад и прелијте ги со “dressing”-от и сето тоа истурете го врз модрите патлиџани.