после питата со тиквици воопшто не ми е чудно кога ќе видам тиквици во благ рецепт. ова чоколадно колаче со тиквици е феноменално, ептен чоколадно, а сочно од тиквиците.
ликер, рум, пиво… сé сме пробале во колачи, ама овој пат колачето е со коњак. неверојатно сочно, дури и поубаво е вториот и третиот ден. го направив еднаш со сливи и еднаш со круши, првиот пат со помалку коњак, вториот со повеќе и дефинитивно препорачувам да ставите повеќе. кога го правев ова со круши, немав рузмарин, ама ако имате при рака, секако ставете, колачето е поинтересно со него.
не е дека немаме до сега правено превртени колачи. баш ова со сливи ни е едно од омилените дома, или истото во зима со јаболка, или ова со цреши и меко како душа тесто од пченкарно брашно. ама ова со кајсии е различно. прво, со кајсии е, иако многу е вкусно и со сливи или со комбинација од сливи и кајсии. второ, во тестото има многу ѓумбир и многу павлака.
оваа торта не е обична чоколадна торта. во неа нема ни млеко, ни јајца, ни масло, ни шеќер, а нема ни глутен бидејќи е направена со брашно од наут и овес. многу е вкусна и слатка и супер оди со резанчиња портокал.
не знам дали негде во скопје можат да се најдат свежи брусници. јас ова колаче го направив кога бевме на гости кај маја и џипу во холандија, ама мислам дека ќе биде исто толку убаво и со вишни… или сливи. само ставете помалку шеќер ако се благи.
Еве едно прекрасно едноставно колаче. Рецептов е од австралискиот готвач Бил Гранџер. Јас имам една од неговите книги и ми се допаѓаат неговите убави и едноставни рецепти. Лесно се прави (дали некогаш вoопшто правам тешки рецепти?) плус дома ќе ви мириса на ванила, цимет и кокос цел ден. Највкусно е топло, ама и следните неколку дена е убаво, ако воопшто потрае толку долго. Се надевам ќе ви се допадне!
да, имаме два колача со кафе едно по друго, ама мора да се согласите дека кафето во колачи добро оди. а овој ролат не е со било какво кафе, туку со espresso barista на dolce gusto.
Еве уште еден од оние рецепти кои се големи хитови во мојот репертоар, а за кои досега не сум ви кажала. Мислам дека пред неколку години, ако требаше да правам десерт за гости или за да импресионирам некого, тогаш правев или чизкејк или тирамису. Потоа додека живеев во Сиера Леоне се фокусирав исклучително на chocolate chip cookies и колаче од банани. А сега во Холандија, повторно и се вратив на чизкејк, најмногу поради тоа што рерната ми е за никаде и најдобро пече на слаби ниски температури…
Чоколадни торти мене ми се едни од омилените десерти… Посебно оние рецепти кои се разликуваат од традиционалната македонска чоколадна торта…. Еве го мојот нов омилен десерт од чоколадо. Веќе 2 пати го направив за гости/специјални прилики и резулататот беше супер. Дури ќе бев среќна и да не им се допаднеше на гостите … тогаш ќе имаше повеќе за мене !
ама затоа имам нов рецепт за чоколадна торта, и тоа не било каква, туку со темно пиво гинис.
Cheesecake е мојот омилен десерт. Импресивно изгледа кога ќе им го дадете на гости, а многу лесно се прави. Овој рецепт го правам со години и го знам на памет. Ама после толку многу бели чизкејкс решив да експериментирам со чоколадо. Ако сакате да се покажете во кујната – еве ви го совршениот рецепт за тоа. Нема да се разочарате.
за подлогата:
200 гр. мелени бисквити (или ако сте во Америка graham crackers, или на други места digestive cookies)
5 лажици стопен путер
за филот:
400 гр. крем сир (АBC, Дукат или некој сличен)
1 павлака (250 мл.)
1 чаша хопла (користете ја чашката од павлаката за мерење)
1 чаша бел шеќер (мерејќи со чашката од павлаката)
3 јајца
3 лажици брашно
+ за чоколадниот дел:
3 полни лажици какао
2 лажици шеќер
Во посуда, измешајте ги мелените бисквити со стопениот путер, и притиснете ги на дното од тавче од 22 сантиметри (ако имате тавче од 24 цм, ќе ви треба малку повеќе бисквити и стопен путер, ама ќе имате доволно фил со овој рецепт). Силно притистнете ја мешавината од бисквити за да се направи рамна подлога. Печете ја подлогата 10 мин во загреана рерна на 200 Ц степени. Извадете ја од рерна и оставете ја да се олади. Треба да биде само малку заруменета.
Во меѓувреме, ставете го кремсирот во посуда и почнете да го матите со миксер. На него додадете ја павлаката, хоплата, шеќерот, јајцата и на крај брашното. (ако почнете со матење на кремсирот, филот ќе ви биде мазен и убав, инаку може да останат грутки кремсир неизматени).
Истурете пола од филот во тавчето врз оладената подлога. На останатиот дел од филот додадете го какаото и дополнителниот шеќер и изматете пак. Истурете го чоколадниот фил врз белиот. Јас се обидов да направам поубави шари ама не ми успеа баш.
Печете го чизкејк-ов во загрена рерна на 180 степени околу саат време и потоа обавезно оладете ја во фрижидер барем 6 саата, ама најдобро преку ноќ. Потоа исечете ја или како традиционална торта или во помали коцкасти парчиња како што направив јас. Уживајте !
