не знам за што попрво да ви кажам од ова јадење. дали за сочното свинско испечено во глинен сад romertopf, за печениот сладок компир, праз и други зеленчуци или за сосот од кикирики, кој совршено оди со нив. треба повеќе време да се зготви сето тоа, ама освен сецкањето на зеленчукот, нема многу работа.
по бургерите од грав и наут, ја продолжуваме серијата вегетаријански бургери со овие од леќа, моркови и цвекло. ова е уште еден вкусен начин да се искористи пулпата која останува по цедењето сок, ама ако немате соковник, во бургерите ставете рендани цвекло и морков.
изгледа како веќе да е почната пролетта, само мене кога сум дома ми студи. затоа ја направив оваа супа. свежа и не премногу зачинета, ќе ве загрее ако и вам ви студи.
ако имате соковник, сигурно знаете колку е убаво да се пијат свежо исцедени сокови од овошје и зеленчук. ние поретко цедиме зеленчук, најчесто пиеме сокови од грејпфрут, јаболки, портокали, мандарини, ананас, лимон, крушки, праски, јагоди… од зеленчуците во скоро секоја тура ставаме моркови и цвекло, понекогаш парче свеж ѓумбир, ама во последно време почнавме да додаваме и сладок компир. сокот со сладок компир е многу вкусен и несомнено многу здрав. пробајте. измешајте го со други зеленчуци и овошја и кажете ни која е вашата омилена комбинација.
минатиот викенд имавме на гости една другарка од битола, елена, која остана неколку дена. во саботата елена ни направи многу убав ручек: интегрален ориз со многу зеленчуци, сирење халуми “на скара” и за десерт – интегрален ориз со урми. сé беше многу вкусно, особено додатокот од рендана кора од лимон, кој го направи оризот многу свеж.
надвор врне и дува и сигурна сум дека една ваква супа е сé што ви треба.
ова е нашата омилена супа. многу често ја правам, во големо тенџере и ни трае по неколку дена.
количините се отприлика, без мерење, а од состојките, пилешкото, морковите и компирите се обавезни, а друго, зависи од сезонската понуда на зеленчуци и моменталното расположение. пашканат, целер, брокули, карфиол, тиквица, грашок, многу ретко фиде, понекогаш една шака ориз или јачмен или пченица, магдонос или спанаќ или ливчиња целер… дури и листови од брокула или од карфиол. некогаш додавам изматено јајце, некогаш кнедли… јас ја јадам со многу бибер.
има денови кога навистина не ми се готви, а ми се јаде нешто интересно. за нешто вакво, како овие полнети листови блитва, само прочачкајте што имате по фрижидерот.
оваа чорба не е за секого. мене ми е многу вкусна. и вас ќе ви се допадне ако ги сакате овие вкусови: печен модар патлиџан, наут, зготвени домати… сето тоа зачинето со кари. многу вкусно. со парче лепче доволно е за ручек.
знам, си викате “пак ли хумус?”. ама овој е сосема различен и многу многу вкусен. мароканскиот лимон му додава многу интересна арома.